الأربعاء، 30 يونيو 2010

iPhone 4

بعد مانزل الايفون ٤ رسمي اغلب المستخدمين قالو عن مشكله السيرفر وبما ان نزل رسمي بألمانيا .. قلت اروح اتأكد ... طبعا ماسألت الموظف بس جربته بنفسي .. يمكن مو كل الاجهزة فيها هذي المشكله بس اتوقع اغلب الاجهزة اللي نرلت اول دفعه... يعني حظك نصيبك
بعدها وخرت اصابعي عن الفتحات اللي على اليمين واليسار ورجع السيرفس
وعندي استفسار .... انا عندي الثري جي اس ولما سويت الابديت اليديد صارت عندي مشكله ينقطع الوايرلس لما انزل برنامج من الابل ستور ... ويتوقف التحميل ويظل يوم على هالحاله ... في احد نفس حالتي ؟؟؟ وهذي صوره
- Posted using BlogPress from my iPhone

الثلاثاء، 29 يونيو 2010

منوعات ألمانيه

من بدايه مباريات كأس العالم والسوق اغلبه على كور واغلب شي علم ألمانيا وفي بعض الاشياء تكون على زيبرا وتايقر يعني افريكا وصورت بعض اللي شوقني

كيكه اسفنجيه
برد لذييييذ
شموووع واكواب تشووق
صينيه على ملعب وقلاصات صغار للمنكر .... امي شرت مثلهم وحطتهم للجاي يعني فنتك بدال الاستكانه خخخخخ
شوايه تونس
حتى جيس الجمعيه على صور لاعبينهم واسمائهم
كفرات حق الايفون
رموش حق الشو وقت التشجيع لووول
صوابين
صابون للايد على افريكا
عطر رجالي
والابل ستور نزل برنامج تلوين الوجه على اعلام المنتخبات المشاركه
واخييييرا ولدي ضمن مشجعين منتخب جيرمني ... تيشيرت وكاب وساعه
- Posted using BlogPress from my iPhone

الخميس، 24 يونيو 2010

الأقربون أولى بالمعروف

دائما سباقه بأعمال الخير يالكويت

الحمدلله دايما رايتج بيضه

بس هم الأقربون أولى بالمعروف

الرابط

مع تحياتي :

q8-lawyer

الجمعة، 18 يونيو 2010

توهق البطل مع التحديث

الصورة تمثل حالتي في هذا الوقت
في شهر اكتوبر اللي فات اتصلت علي زوجه صاحب زوجي وهي من الجاليه العربيه

تبي تتعرف علي
وعزمتها على شقتي وكانت العزيمه خفيفه وقعدت نص اليوم عندي
هذي عزيمه خفيفه لووووووول
وكانت اول واخر مرة اشوف هالانسانه
اتصلت اكثر من مرة بعدها وكان يصادف انشغالي في البيت
واقول اذا فضيت اتصل ... طبعا افضى وانسى الاتصال
وراحت في حال سبيلها

انا من النوع للاسف انسى بسرعه الاشكال والاسامي
مرة صاحبتنا ام مشمش قالت متوظفه عندنا بالدوام وحده كانت معانا بالكليه
وسالت يمكن تعرفونها ؟؟ فلانه الفلاني

وانط بجاوب الاولى قلت ايييييييييي الطويله والبيضه
قالت عاد قصيره وسمرة لوووووول
مشكله اللقافه ........
نرجع لزوجه صاحب زوجي ... بلغني زوجي امس انها بالمستشفى وبغرفه 309
قررت اليوم ازورها وقلت لازم امر اخذ جم ورده اللي يحطونهم الالمان بقراطيس وكاكاو كشخه
واقعد من صباح الله خير مثل الشقرديه واتريق مع عيالي ونكشخ ونطلع
وكنت مواعدتهم نتغدى بيتزا بالايطالي

وانا في دربي لمحل الورد اتصل زوجي وقالي اتصلي عليها يمكن تكون طالعه من المستشفى
قلت ماعندي رقمها .. قال اوكي اخذه من زوجها ..... قلت مااعرف اسمها خخخخخخخخ
قال نعم ؟؟؟
قلت والله توه طرى علي ... اصلا نسيت اسمها ..........

قالي مو لازم الاسم خخخخخخخخخخ
قلت شلووون ازور انسان ناسيه اسمه !!!!!
احاول اتذكر مني مناك ...
بطلت موبايلي اشوف الكونتاكتز يمكن يطلع اسمها يشابه احد الاسامي الموجوده

ماكو
اغلب الاسامي ام فلان وام فلانه وبنت الفلاني واسامي دلع لوووووول
وهقه شنو اسويييييييييييييي
ياربي من تخرجت من الجامعه وانا عندي فقد جزئي للذاكرة ...
اشوى اذكر المقربون من الدرجه الاولى
اما اكثر من هذي الدرجه نسيتهم
المشكله لو اروح واسال النيرس هناك شنو اسم اللي بالغرفه 309

راح تجاوب وتقول السيده فلان لوووووووووول
والله اعرف اسم زوجها وبالكامل بس اهي شنو اسمها
تمشيت بالسنتر واحاول اتذكر واتصل زوجي يسأل تذكرتي الاسم والا لا
قلت لا
قالي زهرة .. عائشه ... هند ههههههههههه
قلت ولا واحد ........

رجعت للبيت طبعا بعد ماتغدينا بيتزا ...... لازم مطعم مع كل طلعه والا مانصير كويتيين

والى هذا الوقت من منتصف الليل وكريزي تفكر بالاسم وتحاول تتذكر
ياربي ساعدوني شنو اسوي والله ابي اكسب اجر بدون مااتفشل ......
عاد عندي حساسيه من الفشله
تحديث

تم بحمد الله الزيارة
اول مادخلت وسلمت .. دخلت صاحبتها وقالت لها كيفك فلانه
قلت هييييييييييييييياااااااااا واخيرا عرفت الاسم

شكرا لتفاعلكم واقتراحاتكم

الثلاثاء، 15 يونيو 2010

إعذريني يالكويت الحبيبه كم أتمنى هالوقت أن أكون بدوله أخرى باااارده

تخيلوا وصلت درجة الحراره 56
بس الحمدلله كانت بس مجرد لحظة تصويري
وأغلب الوقت تكون بين ال50 وال54
الظهر وقت طلعة الدوامات حررررررررر
الله يكون بعونه على صيف الكويت
****************
سرحت وانا بالسياره تخيلت نفسي
بمنطقة زيرمات السويسريه
لابسه جاكيتي الخفيف
وقاعده بالمطعم الإيطالي
وتوني خالصه من غداي بيتزا وسلطه
وإلحين قاعده أشرب كافيه لاتيه
وآكل تيرامسيو
جان زين انا إلحين فيها
يبيله زيرمات الساحره
وصفاء جوها أوكسجين100% لأنه مافيها تلوث
وممنوع دخول السيارات لأن البنزين يلوث الجو
تسفط سيارتك بباركن وتركب قطار يوصلك المنطقه
ويستخدمون داخل زيرمات سيارات صغيرونه على كهربه
بس مالنا إلا الكويت ماكو سفره هالصيف :(
مع تحياتي البارده:
q8-lawyer

الاثنين، 14 يونيو 2010

Camel Milk Chocolate

بنت خالتي بآخر زواره وزعت علينا هالكاكاو كانت توه راجعه من دبي وشاريته من مطار دبي وتقول ذوقوا والله حلو
وسألتنه عقب ماكلينا شرايكم بالطعم!!
قلنا والله لذيذ
قالت عاد تدرون شنو داخل قلنا إي حليب قالت هذا موحليب عادي هذا حليب بعارين
طبعا الكل صاح شنووووووووووووووووو
وإلي ما ذاقه قال أشوه ماكليت

**وتذكرت الأخت AM.SA.CHANNEL**

كانت قبل فتره كاتبه بوست عن حليب البعارين ينباع عندهم بالجمعيات

وفي بنكهات مثل الفرواوله والكاكاو للأطفال

ماقصرتي يابنت خالتي العزيزه

وزين سويتي ماقلتي إلا عقب ماكليت لأنج لوقايله قبل جان ماأعتقد ذقته

وتعيشين وتذوقينه أشياء غريبه

مع تحياتي:

q8-lawyer

الجمعة، 11 يونيو 2010

ريوق الذويقه كان احلى وداعيه

مسااا الحب

قبل اسافر بيوم ... طلبت من فرقه حسب الله نجتمع على الريوق
وداعيه من غير شر .. انا اعزم والفرقه تتصرف
مثل سفرتي اللي قبل
وكان اول بوست لي في المدونه

وهالمرة بعد نفس المكان في بيت بسمه ماقصرت حبيبتي
الشي اللي يضحك قبل الموعد بيوم دزت لنا بسمه مسجات .... وصارت هالمسجات سيناريو

احتفظت فيها وصورت لكم بعض منها مع اخفاء الاسامي الصجيه
لووووول
ياجماعه لاتفهمون لوير غلط هههههههه
ترا والله شقرديه بس احنا نحب نطفرها
هذي نظره عامه للسفره
بدخل بالتفاصيل

ميني ساندويتش مشكل والحشوااات وااايد حلوة
سلطه والدرسنق لذييييذ ناتشوز مع 3 انواع ديب
فته تركيه لذيييييييييذه وحاولت اقلدها بس للاسف ماضبطتها
المشروبات
خلاصه من يده مشمش ..... تسلم الايادي
الحلو كان تشيز كيك اممممممممممممممم
الصورة تتكلم عن نفسها
لابد من المكسرات
للتهضيم جاي نعناع
ماي ابراج لووووووووووول
الريوق كان من نونه ماقصرت حبيبتي .... طبعا اهي ماشالله طباخه

بس الريوق كان من وحده كويتيه ولها موقع بالنت وفيه المنيو والرقم

وكان يوم من احلى الايام اللي قضيتها خلال اجازتي بالكويت

شكرا لفرقه حسب الله واحبكم في الله

الاثنين، 7 يونيو 2010

Movie Park

اكمل معاكم الجزء الاخير من اجازتي

بعد ماطلعنا من دسلدوف كانت وجهتنا الى موفي بارك

هني المواقف زززززحمه لان يومها عطله

المدخل
مانستغني عن الخريطه
هذا محل يأجر شمسيات عربات للاطفال والمعاقين وسيفتي بوكس
اول شي لازم يكون هني
شفتها اكثر من وحده
هذا اللي ندور عليه
بالتحديد بوب بوب على قوله بنتي
يعني سبونج بوب لووووول
الجو كان حر وشمسهم حيل قريبه

شرينا مراوح لليهال وبرد
هذا حق اللي يركبون الجندول للتنشيف
عمله ذكرى وانا احب هالسوالف
قررنا نتغدى هني
بنتي خذت بطاطه وقلت لحظه بصور
قطتهاا بدت تفهم امها
الله يخليها لي ههههههه
لما طلعنا لقينا هالشخصيات وصورنا معاهم
بوب كورن :)
هذي بعض من المطاعم والكافيهات الموجوده واكثرها امريكي
سلاش يبرد على القلب
استانست عليه
تشوق صح ؟؟؟؟
رش ماي بارد وناااسه بغيت ادخل معاهم
بطاط 360 لوووول
عنده 4 نكهات واللي جربته
mix
روعه
سلاش كلاكيت تاني مرة هههههههه
اممممم انتعاااااااش
بعد ماخلصنا لعب وقبل نطلع رحنا للمحلات نتسوق
شخباري بنك بانثر
كريزي لازم نشتري قلاص ومواعين ههههههه
سكن اشكال والوان حق ايفوني
سلاش كلاكيت اخر مرة لوووووول
طلعنا وكانت وجهتنا الى ايسن
وصادفنا هالمنطاد ودي وبخاطري فيه بس الخوف ذابحني
منو جربه ؟؟؟؟؟؟
طبعا ايسن فازت هالسنه في عاصمه الثقافه الاوروبيه
وبما ان اليوم كان عطله والديره صخه مااقدر احكم عليها
صادفنا هالمطعم وذكرت جايونه هههههههه
بعد ماخذينا فرة على السريع بالسنتر وصار الوقت متاخر
مافي احد يستقبلنا الا دونر البانهوف لوووووول
يوفكا واصابع الجبن يم يم
خذينا غرفه في هالفندق للمبيت فقط :)
ثاني يوم الصبح شدينا الرحال الى منطقتنا
شكرا لكل من تابعني حتى لو ماعلق على البوستات