الأحد، ٣١ أكتوبر ٢٠١٠

أسبوع الوداع

هالأسبوع راحت كريزي الحبيبه وتركت مكانه واااااااااااضح
منو إلحين لبغيت أطلع فجأه وبدون تخطيط أدق عليها
ومتأكده إنه بتقولي يلا مريني ولا أوكي نتلاقى هناك
ماكو غيره كريزي انا مسميته الزوجه العزوبيه
من تزوجت واهيه بالكويت شبه عزوبيه
يعني انا الرابح الأكبر من غربة ريله
وهم عقب سفرة كريزي بيومين
خدامتي آسفه قصدي معزبتنا
جانيت سافرت بفقده واايد مع إنه مااااايقه
وشااااااااااايخه علينا بس ماعليه يحقله
فيها ميزه تخلينا نغض النظر عن عيوبه واهيه أماااانته
وإنه ماتمد إيده على عيالي لو إنهم طقوها
((انا عيالي اسمله عليهم والله يصلحهم كتاكيت
بس مرات وااااااااايد يصيرون نمور ))
عاد انا أقول لكريزي شدعوه عليج يعني جانيت أحسن منج حاجزيله تذكره روحه ورده
3 شهور وإنتي ياحافظ قعدتج بس شهرين كلمي كفيلج بألمانيا-كفيله يعني زوجه-
وقوليله بكمل ال3 شهور حالي من حال جانيت شردت علي كريزي وقالت:
انا كلم كفيل مال انا يقول انا بجا(بيبي) في سكول
انتي مايبي يجي إلحين طرشي تذكره
وقعدي هههههههههههههههههههههه
فصلنا آخر إسبوعين على هالسالفه :))
يلا ماعليه هذي الدنيا
تروحين وترجعين بالسلامه ياااارب
وإنتي ماشاءالله عليج متحمله الغربه
وصابره على كراف ومسئولية الغربه
عشان ريلج صج لقالوا وراء كل رجل عظيم امرأه
وطبعا وبلا شك هالإمرأه
كريزي
:))
وبالنسبه لجانيت ياويلج اذاوهقتيني ومارجعتي
يااااخوفي من سوالفكم إي مدام شووووووووور
انا راح يرجع انا مابي أرجع ماياخذ تذكره
إي صاااجه صدقتي بنات عمج ماياخذون التذاكر
ويعشمون معازيبهم وآخر شي هذا وجه الضيف
ماعليه إن رجعتي خير وبركه
وإن مارجعتي الحمدلله عندي ثانيه تسد المكان
أما كريزي ياليت ترجعين شهر 4 أحلى شي
الجو حلو بالكويت والطلعات تحلو
ياااااااااشين هالأسبوع
مع تحياتي:
q8-lawyer

الخميس، ٢٨ أكتوبر ٢٠١٠

وداعيه ياآخر ليله تجمعنا

شهرين ... كل مطعم كان ودي اروحله رحتله كل طبق اشتهيته ذقته كل سبا كان بخاطري دخلته ودلعت روحي كل يوم انام اكثر من اللازم عشان اشبع من النوم كل يوم اسهر وانام وانا ماوراي شي يشغلني او يخليني اقوم غصب بعد الشهرين .... جهزت الجناط وحطيت الدرابيل والرهش واعلام الكويت وسنفرة المشمش هههههههه باجر بإذن الله نشد الرحال الى جيرمني التعيسه قصدي السعيده عشان مايزعلون بعض الناس :) شكر من كل قلبي الى امي الغاليه فديتها والى خواتي واهلي جميعا وفرقه حسب الله خصوصا لوير :) الكل ماخلو شي بخاطري الله يخليكم لي ولا يفرقنا يارب شكر لكل متابعي مدونتي جميعا ويتجدد لقائي معاكم في جيرمني ان شالله استودعكم الله الذي لاتضيع ودائعه


- Posted using BlogPress from my iPhone

الأحد، ٢٤ أكتوبر ٢٠١٠

Green Tea/2

عجيب هالشاي الأخضر كلش مافي مروره شحلات طعمه حتى بدون شكر أنصح عشاق الجاي لأخضر بتجربته صناعته لبنانيه صج هاللبنانيين ذويقه وتحصلون هالجاي بمركز سلطان


- Posted using BlogPress from my iPhone

الاثنين، ٤ أكتوبر ٢٠١٠

ابشروا بالخير :)

ولدي الصغير الله يحفظه صارله إسبوع مايطلع إلا بالبوت المطري طبعا مو بإيدنه غضبن علينا حاولنه نفهمه ماكو فايده بجي وصيااااااح ومناحه الله يهداه ويصلحه قفل على هالسالفه !! من زين الجو خايفه لا تقب قاعة ريله حساسيه ولا تنصلخ من البوت والحر الله يستر عليه>> بس يلا إن شاءالله بشارة خير و بطق عليكم مطر ;)
- Posted using BlogPress from my iPhone