الثلاثاء، ٢٧ يوليو ٢٠١٠

صديقتي الالمانيه

مساااء الخير
من فتره زارتني صديقتي المانيه بتينا وتكلمنا في اكثر من موضوع

انصدمت بصراحه من نظرة المراه الغربيه للمرأه الشرقيه او بالاخص الخليجيه
في البدايه عطتني مجله المانيه تتكلم عن دول الخليج العربي وصارلها 29 سنه
وصفت المجله انها انتيك :)

مع المجله صابونه الشاي الاخضر من فرنسا
الهديه كانت بسيطه وحلوة
وبعد ماعرفنا اخبار بعضنا دار بينا هذا الحوار"
كان باللغه الانجليزيه بس راح يكون مترجم :)

بعد ماتصفحت المجله قالت بتينا : تصدقين ان هذا دبي من ثلاثين سنه !!!!!!
كريزي : اي حتى الكويت بعد مو هذي صورتها حيل تغير المكان الحين
بتينا : اي الكويت قبل .. بس حاليا الكل يتكلم عن دبي
كريزي بعد ماقالت ماشالله بقلبها : اي انا زرت دبي ليوم واحد
بتينا : وين رحتي ؟؟
كريزي : اتلانتس و ....
قاطعتني بتينا وقالت منبهره : ناااااااااايس اتلانتس
حبيت اغير الموضوع وتمنيت الله يرزقنا والعالم تبنهر في ديرتنا

والله يحفظ دبي ولا يغير عليهم يااااارب
رجعت بتينا وسالت : ليش الخليجيات اهتمامهم الشوبينق وبس ؟؟ ماتحبون الطبيعه والورود والمتاحف
كريزي : منو قال ؟؟
بتينا : انتي من 3 سنين اعرفج ولا مرة سالتيني عن متحف والا حديقه زهور لوووووووووول
فشلتني :(

كريزي تبي ترقع الوضع : انا احب هذي الاماكن وعيالي مزعجين مايخلوني استمتع :(
بتينا : بالسوق يعني مايزعجونج هههههههه صااادوووه
كريزي رجعت تتكلم بجد : الخليجيات جامعيات ومثقفات وبنفس الوقت يحبون الاهتمام بنفسهم .. ..
بتينا بطنازة : وانتي شنو اللي بخاطرج غير جنطه شانيل وديور ؟؟؟؟؟؟؟

حسيت بمصخره وقلت : بخاطري اركب منطاد لووووووول
الحديث كان شيق وبالنهايه سالتني سؤال :

صحيح عندكم اكثر من عايله تسكن في بيت واحد ؟؟
كريزي : اي
بتينا تسال مستغربه : معقوله عايشين بسلام وبدون مشاكل ؟؟؟
كريزي : اي وبعضهم ياكلون مع بعض بالوجبات الرئيسيه

بتينا : الحين عرفت عندكم محد يشرب خمر ... لانكم مرتاحين في حياتكم العائليه
كريزي لاتعليق :)
بتينا : خلاص ابي اعيش عندكم لووووول
كريزي : تعالي احلى وقت برمضان والبسج دراعه وبخنق بالقرقيعان :)
الحديث استمر لمده 3 ساعات مروا بسرعه
وودعنا بتينا
وهذي صور تبين تاريخ المجله وبعض الصور داخلها

هناك ٢٥ تعليقًا:

  1. استانس لمه اقعد معه ناس يكونون من دوله ثانيه حلو اكتساب الثقافات

    اعرف وحده لمه تقعد معه وحده اجنبيه تقولها صج انتو بالكويت النفط عندكم ينباع بالجمعيات وعند بيتوكم فيه جمال وخيم

    استغرب انه فيه ناس جذي نظرتهم للكويت ومايعرفون شي

    ردحذف
  2. واي حسبالهم احنا تافهين وماهمنا الا السوق ..

    في شغلات اهم انا لما سافرت دبي حبيت الاماكن السياحيه اكثر من السوق السوق عندنا بالكويت كل شي..

    مرسو..

    ردحذف
  3. دودو

    صحيح كلامج لما تقعدين مع اهل الديرة تعرفين اكثر عن طريقتهم وتفكيرهم واهتماماتهم

    قبل كانو يفكرون ان كل شخص يملك بير بترول ههههه

    بس الحين لا الاغلبيه يعرفون ان البترول للدوله

    عيل لو اقولج مرة ماخذه ولدي من الحضانه واسالتني ام طفل انتي من وين ؟؟ قلت من الكويت .. قالت وين صايره الكويت هههههههههه

    ردحذف
  4. رورو

    وااايد عبالهم احنا بس همنا الشوبينق وبس :)

    ردحذف
  5. بصراحة ماينلامون

    نظرة سريعة لاغلب المدونات النسائية ونعرف ليش علبالهم

    حريمنا ما همهم الا الشوبنق

    ردحذف
  6. غير معرف

    صح ماينلامون تدري ليش ؟ لان الخليجيات ناجحات الكل في مجاله ومع هذا يهتمون بنفسهم ومظهرهم الخارجي .. مو معناته اذا شفنا وحده مهتمه بمظهرها معناته انها تافه !! بالعكس انا ولا مرة شفت خليجيه ناجحه بحياتها العمليه والعائليه وماتكون ستايل وعلى الموضه ..

    بالنسبه للمدونه انا اشوفها هوايه وتقضيه وقت الفراغ بالشي اللي تحبه البنت .. مو معنى ه هالشي انها تتافه وماعندها الا هالمدونه ممكن تكون من انجح البنات في مجال عملها او دراستها

    لاتحكم من ورا شاشه كمبيوتر :)

    ردحذف
  7. هههههههههههههههههههههه
    و الله إنتي فنتك ظحكتيني يوم قالتلج من 3 سنين أعرفج و ما سألتيني عن متحف ههههههه .. و الله صدق نحنا جي ..

    ههههههه .. بس تدرين شو أحلى شي إنه الواحد لازم يخالط الناس من دول ثانية يفهمهم كيف نكط حياتنا لأنه وااايدين فاهمين أشياء غلط عنا ..

    و شكرا على هالبوست الحلو

    ردحذف
  8. الكويتيات انجح ناس شاطرين بالبزنس و الشوبينج و مثقفات كاملين لا اله الا الله علينا ... و الصور وايد حلوه ... الكويت حلوه

    ردحذف
  9. اولا انا احييج على صداقتج الجميله مع الالمانيه لأن ابصراحه بعض الاحيان ايكون شوي صعب انج تتعرفين على احد من ديره ثانيه وخصوصا اجنبيه

    ثانيا لمن فكرت ان الخليجيات بس همهم السوق مانلام تدرين ليش اذا عندنا بعض الشعوب العربيه تفكر نفس التفكير دايما ايفكرون ان احنا شعوب تافه وبس تبي تصرف فلوس وهاذه سامعته بذوني في اي قعده نقعدها مع اي بنات من دول عربيه مع العلم والله لو اهمه عندهم فلوس جان ماقصروا بالشرا لكن كلام الالمانيه فيه من الصح لأن ساعات لمن اقول حق اي احد يلا خل نروح متحف ولا مكان تاريخي ايقولون لي مالنا خلق احنا مومال هالسوالف حته لو ساعات نطلع انروح مكان طبيعه في امريكا والله ان اختي ماتنزل اتقول ماحب هالخرابيط

    ثالثا الالمانيه الثانيه الي قالت وين صايره لكويت ترا احب اعطيج معلومه ترا بعض الدول الاوربيه وامريكا ترا شعوبها موكله مثقفه حطيها بعين الاعتبار تعرفين ليش لأن بس يعلمونهم عن خريطة دولتهم وعلى فكره ترا لكويت ماعرفوها الدول الاجنبيه الا بعد الغزو وليلحين ساعات والله لمن اروح اي محل ويسألوني من وين اقولهم من لكويت يعطوني وحده من الاجابات يا اما يجاوبون بسؤال وين صايره لكويت او يجاوبوني وااااااااااو رج بيبل على طول يعني شعب غني لووووووووووول

    ردحذف
  10. blogwalking..
    so nice blog.. post too
    interesting and somehow funny
    regards

    ردحذف
  11. اي والله صاجه هالألمانية ..

    احنا لو فينا علة تختفي بس ندش السوق :))

    والله يحفظ دبي وأهلها ويرزقنا ما رزقهم .. بصراحة ناس اشتغلوا صح والله يهنيهم يارب

    خوش سالفة :) صج بتكونين بالكويت برمضان؟

    ردحذف
  12. علامهم العجانب ماخذين فكره غلط عنه!!

    عاد احنا خووش ناس بس خل يتمقلون فينا اكثر :d

    ردحذف
  13. مرحبا ...
    عساج بخير انشاله =)

    أحيي فيج هالروح الحلوة مع صديقتج الألمانية
    تبادل الخبرات شي جميل بينج وبينها
    راح تستفيدون وايد من هالعلاقة

    واعجبتني سالفة مانشرب خمر ( لأنه مرتاحين من حياتنا العائلية ) لووول ;p
    جان قلتيلها
    أحنا عندنا ايمان بالله تعالى
    يخلينا ما نعتمد على مخدر بسيط مفعوله سريع
    وبسرعه يروح ويرجع لنا الألم
    تحياتي لج

    ردحذف
  14. AM.SA.CHANNEL

    لوووول احس صج مصخرتني :(

    وايد تعرفت عل اطباع الالمان منها ..

    العفو حبوبه :)

    ردحذف
  15. Blog 3amty

    شكرا ومرورك بعد عجيب :)

    ردحذف
  16. Girls and Kuwait City

    وانا اشهد على كلامج 100%

    مرورج الحلو حبوبه :)

    ردحذف
  17. Q8-Borgy

    اولا شكرا على التحيه .. الحمدلله تعرفت على وحده مثل بتينا واايد تشتط ودور تجمعات عربيه وتقولي عنهم بس انا مااحب اختلط بالعرب هوني ههههههه

    ثانيا انا معاج بكلمه لو هم عندهم فلوس ماقصرو بالشرا ... من ناحيه المتاحف انا مو اي ممتحف يشدني والحدايق مااحبها لاني مااحب الحشرات .. احب امر عليها من بعيد لين بعيد ههههههههههه

    ثالثا صح بتينا قالتلي ان من الغزو عرفنا الكويت .. وصحيح اذا قلنا كويتيين اول شي يطري عليهم النفط :)

    الله يحفظ هالخير وديرتنا من كل مكروه

    شكرا على المرور والتعليق الحلو:)

    ردحذف
  18. gmr14

    حياج الله في المدونه وتعليق زاد البوست متعه اكثر :)

    شاكرتلج المرور

    ردحذف
  19. Engineer A

    ههههههه حلوة لو فينا عله تختفي من ندش السوق .. بصراحه انا استمتع واحسها متعه لو مااشتري :)

    الله يسمع منج :)

    ان شالله راح برمضان نكون بالكويت :)

    هالوقت بالكويت مايتطوف :)

    ردحذف
  20. Made n Q8

    اذا تمقلو يعرفون احنا خووش ناس :)

    ردحذف
  21. Fiona

    مرحبتين وانا بخير دام اشوف تعليقاتكم الحلوة :)

    اشكرج على التحيه وفعلا حيل استفدت من العلاقه ..

    بالنسبه لسالفه ديننا وايماننا بالله سبحانه وتعالى مااحب ادخل فيها مع بتينا لانها من تحب الاعمال التطوعيه اللي تصير بالكنائس .. ووايد متمسكه في دينها وانا ادعي ربي الله يسخرلي واقدر ادخلها بالاسلام .. الله قادر على كل شي سبحانه :)

    شاكره مرورج حبوبه

    ردحذف
  22. جميل أن ننشر ثقافتنا وجميل أن نستفيد من غيرنا
    أنا على فكرة في الأسفار أحب أزور الأماكن غير التقليدية : مثل الحدائق المفتوحة اللي يسمونها (السفاري )والأماكن التي تظل تغذي الذاكرة لطرافتها وغرابتها ...
    والأسواق أيضا من جملة اهتماماتي
    وعلى فكرة أرسلت لعائلة بريطانية كيس قرقيعان ومعاه ورقة مطبوعة بألوان زاهية طبعت فيها أهزوجة القرقيعان باللغة والحروف العربية ومعها نسخة باللغة العربية بحروف انجليزية ونسخة ترجمت فيها كلمات القرقيعان ترجمة طريفة مرحة ليطلعوا على عمق ثقافتنا وبساطتها وشفافيتها
    وكانت فرحتهم بالهدية واضحة

    ردحذف
  23. جميل أن ننشر ثقافتنا وجميل أن نستفيد من غيرنا
    أنا على فكرة في الأسفار أحب أزور الأماكن غير التقليدية : مثل الحدائق المفتوحة اللي يسمونها (السفاري )والأماكن التي تظل تغذي الذاكرة لطرافتها وغرابتها ...
    والأسواق أيضا من جملة اهتماماتي
    وعلى فكرة أرسلت لعائلة بريطانية كيس قرقيعان ومعاه ورقة مطبوعة بألوان زاهية طبعت فيها أهزوجة القرقيعان باللغة والحروف العربية ومعها نسخة باللغة العربية بحروف انجليزية ونسخة ترجمت فيها كلمات القرقيعان ترجمة طريفة مرحة ليطلعوا على عمق ثقافتنا وبساطتها وشفافيتها
    وكانت فرحتهم بالهدية واضحة

    ردحذف
  24. كان جارتنا من كندا وزوجها وأبناؤهما الأربعة هم جيراننا في الكويت وكنت في رمضان أرسل لهم مثل ما أرسل لغيرهم ( نقصة )يعني شيئا من فطورها ليتذوقوه ... وأكتب لهم اسم الطبق ونوعه حلو أو مالح ومكوناته ومتى يؤكل : مع العشاء ( الفطور ) أو الغبقة أو مع القهوة
    وكان هذا يفرحهم جدا ويعطيهم انطباع إيجابي جدا عن العرب والمسلمين والإسلام ...
    ونفس الشيء عملته لما رحلوا وسكن بدلا منهم إيطاليون لكن واضح أم الكنديين أكثر حبابة من الآيطاليين

    ردحذف